27 dic. 2016

NADAL NA BIBLIOTECA



Na biblioteca de Lulu tamén se celebrou o Nadal:


Boas festas!
- Rifouse unha cesta de libros entre as usuarias e os usuarios da biblioteca que levaron préstamos durante os últimos vinte días lectivos. A experiencia resultou todo un éxito, xa que se realizaron máis de trescentos empréstitos entre o noso alumnado de primaria. 
A papeleta seleccionada (número 9 de cor amarela), gardábaa Laura, de 3º A.

- O martes 20 de decembro, quixemos recuperar a tradición das tarxetas de Nadal para felicitar aos nosos achegados nestas festas. Ademais, as familias aproveitaron a ocasión para fotografar ás súas fillas e aos seus fillos como "Apalpador"; e contamos coa colaboración do Equipo TIC do centro para a confección das tarxetas dixitais.

- O mércores 21, último día de clase, os axudantes da biblioteca repartiron nas titorías o calendario de fábula con recomendación lectoras, elaborado por alumnado de todos os niveis. E algunhas clases tamén se animaron a retratarse co Apalpador, outra maneira de incitar a coñecer este personaxe de lenda que baixa das montañas...



12 dic. 2016

POR UN ANO DE FÁBULA

Por un ano de fábula, no que o obxectivo seguirá sendo a formación de lectoras e lectores reflexivos, críticos e responsable ante a realidade, ademais de creativos..., presentamos este calendario confeccionado entre todos os niveis do CEIP López Ferreiro.

10 dic. 2016

CELEBRACIÓN DO 25 DE NOVEMBRO: A PRINCESA LACA E REFLEXIÓN A PARTIR DA LINGUAXE.


Unha moza traballadora; unha moza que valora e é crítica coa realidade; unha moza intelixente, que compón obxectos únicos grazas á súa creatividade; unha moza que vai collendo sona entre a súa comunidade... Será unha moza que ten que traballar para o poder...? Ou será o poder quen debe acabar con ela?

 A historia desenvólvese na lonxana Birmania, pero a valoración das mulleres, e por tanto dos seus dereitos como persoas, debe estar presente en calquera cultura. Tamén na nosa.


 A lectura teatralizada deste conto, serviu para conmemorar o Día da non violencia de xénero na biblioteca do CEIP López Ferreiro. E serviu tamén para compartir unha magnífica merenda preparada polo servizo de cociña do noso centro.


A PRINCESA LACA on PhotoPeach

27 nov. 2016

PARA QUEN IRÁ A CESTA?

A biblioteca de Lulu quere promover a lectura entre as súas usuarias e usuarios durante todo o curso, pero máis especialmente nestes días próximos ao Nadal.

É por iso que Lulu, a nosa mascota, preparou unha cesta con libros que se sorteará o 14 de decembro. Se queres participar, é necesario posuír unha rifa que se entregará ao retirar un préstamo durante os recreos da biblioteca. Se en dous días non aparece a rifa gañadora, procederase novamente ao sorteo o día 16.

Así que se queres ter un agasallo por adiantado, visita a biblioteca e anímate a participar!


21 nov. 2016

25 DE NOVEMBRO: DÍA DA NON VIOLENCIA DE XÉNERO

O Equipo de dinamización da biblioteca do CEIP López Ferreiro, elaborou este boletín con diversos recursos para traballar a igualdade nunha data na que se recorda que aínda hai violencias invisibles...

18 nov. 2016

NOVEMBRO: MES DA CIENCIA EN GALEGO





 Tamén na nosa biblioteca se celebrou. Primeiramente, realizouse unha exposición con material de ciencias en lingua galega. Sobre esa exposición o alumnado de 6º creou un xogo de tarxetas para que as compañeiras e compañeiros buscaran  a resposta entre o material exposto.





E tamén se efectuaron saídas científicas, xa que as clases de 4º B e de 4ºA asistiron aos obradoiros de Ciencia divertida e Xogando coas estrelas, organizados pola biblioteca pública Ánxel Casal.


A NOSA TRADICIÓN ORAL

Dentro do calendario do libro e da lectura, a primeira semana de novembro está adicada a literatura de tradición oral: lerias, contos, lendas, cantigas, refráns, xogos de palabras, cancións..., manifestacións que se transmitían de boca en boca, e que forman unha das bases da nosa cultura. 

 O alumnado do López Ferreiro, e as súas familias, non quixeron esquecerse deste legado dos nosos devanceiros. Por iso recolleron contos, lendas, poemas, e mesmo xogos e xoguetes no caso dos maiores, e presentáronse no IV Maratón de tradición oral, convocado pola biblioteca pública Ánxel Casal. 

 É de destacar que tamén o alumnado que procede de familias foráneas expuxo as súas manifestacións. Deste xeito tamén descubrimos que as nenas e os nenos de todos os lugares xogan e teñen tradicións moi parecidas no que é a súa primeira socialización.


ACTIVIDADES A PROL DA DINAMIZACIÓN LECTORA



Como nos cursos anteriores, este mes de novembro comezamos as actividades de dinamización lectora entre as familias e mais as nenas e os nenos.

E queremos empezar lembrando a un profesor galego, e xa todo un clásico como escritor  na nosa lingua, que nos deixou no verán de 2016: Agustín Fernández Paz. A ocasión, serviranos para comentar o seu libro Malos tempos para os fantasmas, e tamén para valorar as súas calidades humanas a partires do visionado en vídeo dalgúns momentos que compartiu co alumnado do López Ferreiro.





 E como tamén neste mes hai unha data especial para lembrar a non violencia de xénero, o Equipo de dinamización da biblioteca decidiu dar a coñecer o conto La princesa Laca. Para iso, o día 29, familias e alumnado estan convidados á representación do conto na biblioteca, a partires das seis da tarde.








30 oct. 2016

CELEBRAMOS O DÍA DAS BIBLIOTECAS


O 24 de outubro celébrase o Día das bibliotecas escolares. No López Ferreiro, fixémolo o 25 de outubro, xa que os martes é o día que as familias veñen ao centro para comentar diversos aspectos co profesorado.

Nesta ocasión, visitounos Mabela Casal Rey, directora da biblioteca da USC. Grazas a ela constatamos que hai diferenzas entre a biblioteca universitaria e a nosa: a súa ten moitos máis anos de antigüidade e, por tanto, non é comparable o número de volumes, e o seu material está dirixido a un público adulto que tenta ser especialista nunha materia.

Pero hai algo que nos une: as bibliotecas non poden ser  un almacén de libros...Hai que facelas dinámicas e eixos transversais no proceso de ensinanza e aprendizaxe, algo que se dá en todos os momentos da vida.
Polo de pronto, ese día algunhas nenas e nenos de tres anos xa comezaron a levar libros.

Dentro desa dinámica, solicitamos á Asesoria de bibliotecas escolares dúas maletas viaxeiras que nos chegaron repletas de material  para traballar en, e  coas, familias. Este material pode levarse en préstamo ata o 15 de novembro, pero debido a que ao elevado número que conforma a nosa comunidade educativa, nesta ocasión a actividade está dirixida, primordialmente, ás familias de 3º e 4º.

E, por suposto, as suxestións feitas a Lulu, tamén contan. Na avaliación da biblioteca realizada o curso pasado, comprobouse que o alumnado solicitaba material para gozar do recreo realizando "pasatempos". Por tanto, adquiríronse fondos deste tipo que as axudantes da biblioteca presentaron polas aulas. Agora xa está a disposición de todas e de todos: hai que seleccionar o xogo (hainos de diferentes tipos e para as diversas idades); ler moi ben as indicacións antes de realizalo e, finalmente, pedir aos axudantes da biblioteca que nos recorten a ficha apara levar para a casa.



E coincidindo coa celebración da Semana das bibliotecas, o usuario que máis empréstitos solicitou e levou o curso 2015-16, recibiu un pequeno agasallo da biblioteca de Lulu. Parabéns a Hugo e a ver quen se anima este ano a imitalo!

HAI QUE PREPARAR O CALENDARIO DE 2017

Xa vai quedando menos para despedir o 2016. E como todos os anos desde o equipo de dinamización da biblioteca, coa colaboración do noso alumnado, crearemos o calendario de recomendacións lectoras para o 2017.

Como seguro que será un calendario de fábula, as ilustracións farán referencia a este tipo de narracións. Pero como hai tantas, cales elixir?

Se queres axudarlle a Lulu na selección, encontrarás papeletas para votar no andar da biblioteca. Podes seleccionar ata cinco, e as gañadoras, compoñerán o noso calendario...

Anímate a participar! Tes de prazo ata o 15 de novembro



TEMOS NOVO MATERIAL

As primeiras novidades vanse incorporando á biblioteca de Lulu.

En breve, poderedes levalas en préstamo.



30 sept. 2016

ÁBRESE A TEMPADA 2016-17



Como todos os anos, a biblioteca de Lulu, que é a da comunidade educativa do CEIP López Ferreiro, abre as súas portas coincidindo coa chegada do mes de outubro.

Xa hai novidades editoriais para recibirvos; están programados pequenos concursos para desenvolver o gusto pola lectura; reservouse un espazo nos horarios para a formación de usuarios...E hai nenas e nenos que coñecen a data reservada para achegarse á biblioteca ou aos obradoiros creativos.

E é que este curso, no que se traballará como Proxecto Documental Integrado as fábulas, os mitos e as lendas, non podía faltar a lembranza a Penélope: calcetando pompóns, chegaremos ata a obra de Carlos Casares.

E para as casas, xa están dispostas as mochilas viaxeiras. Procurouse ter en conta, na medida do posible, as suxestións expostas nos cadernos durante estes cursos. Así, os máis pequenos disporán de máis tempo para tela na casa; e os maiores, poderán xogar dun xeito cooperativo con toda a familia.
Serán distintas maneiras  de ler na que estaremos acompañadas e acompañados polos axudantes da biblioteca.

Así que xa sabedes onde Lulu vos agarda: na biblioteca do CEIP López Ferreiro.

7 may. 2016

INVESTIGAMOS E CREAMOS LIBROS VIRTUAIS.


Na biblioteca realizamos tarefas de animación á lectura; tamén de formación de usuarios, é dicir, de como desenvolverse nunha biblioteca e localizar o material necesario...Pero todo iso, con que finalidade? Para ensinarlles como buscar unha información; para desenvolver entre as nenas e nenos o sentido lúdico que se pode extraer dunha lectura; para favorecer o traballo cooperativo; para potenciar as habilidades creativas e artísticas entre o alumnado...En definitiva, para aprender a aprender.

Os presentes libros virtuais, elaborados grazas ao apoio e colaboración do equipo de novas tecnoloxías do centro, amosan unha parte do labor feito a partires do Proxecto documental integrado no que participa todo o centro: "A Idade Media en Compostela, unha historia para-lela". Atoparán contos; poemas; mostras de literatura oral; traballos de investigación que versan sobre os oficios medievais, os alimentos desta época, os camiños a Santiago e os seus símbolos...

Así que...Poñan os lectores a funcionar.

2 may. 2016

AUDIO LIBRO: ANACOS DE TRADICIÓN ORAL




A transmisión de historias durante a Idade Media facíase, esencialmente, de xeito oral. O alumnado do López Ferreiro, coa axuda das súas familias, recolleu algunhas desas manifestacións e con elas compúxose este audiolibro. Outra maneira de festexar o Día do libro!



29 abr. 2016

VISITA DAS AUTORAS LEDICIA COSTAS E ANA ALONSO.



O 20 de abril, as nenas e os nenos de 4º coñeceron á escritora Ana Alonso, unha bióloga leonesa, ex-profesora, autora da colección "Pizca de sal", serie de libros que cun ton didáctico e á vez, ameno e divertido, achega os contidos curriculares desde outra perspectiva.

Nesta ocasión falaron sobre La herencia de Pedro, a historia dun neno orfo que abandona o mosteiro para converterse en cabaleiro...Canto pode aprenderse sobre a vida e os costumes da Idade media da man dun neno!


ANA ALONSO e LEDICIA COSTAS on PhotoPeach


Pero se hai unha escritora exitosa neste momento, esa é, sen dúbida, Ledicia Costas quen, asemade, escribe na nosa lingua.

Visitounos o 12 de abril e tentou responder a todas as preguntas das nenas e nenos de 4º e 5º sobre Escarlatina, a cociñeira defunta. Así, coñeceron que moitas situacións reflectidas no libro están baseadas en situacións reais (por exemplo cando Dodoto se meteu na lavadora), e mesmo que a ela lle chaman moitas veces "Escarlatina" no canto de Ledicia...

Por outra banda, resultoulle sorprendente que no CEIP López Ferreiro xa houbera lectoras e lectores do seu novo título, Esmeraldina, a pequena defunta. Sobre todo, tendo en conta que só había tres días que se publicara... Ao final, recibiu distintos agasallos personalizados (libros de receitas especiais, debuxos, poemas...), e Ledicia asinou, pacientemente todos os exemplares.

DÍA DO LIBRO 2016

Despois de todo un mes de marzo dedicado á poesía, había que outorgar os premios correspondentes ao II Concurso de poesía Bibliolu. E iso aconteceu xusto a véspera da celebración do Día do libro, é dicir, o 22 de abril.

Era imposible que todos gañaran, pero si houbo agasallos especiais polo esforzo e o tempo que cada quen soubo darlle a este xénero literario.Os poemas premiados presentaranse no blog nunha data próxima; e os poetas e poetisas, puideron ampliar as súas inquedanzas lectoras na libraría Couceiro de Santiago, onde, asemade, tamén escoitaron unha explicación sobre como fora a historia da edición dos libros...

28 mar. 2016

MARZO: MES DA POESÍA



O Día de Rosalía celebrámolo no centro o 24 de febreiro, pero tamén se programara a realización dunha rota polos lugares máis significativos da biografía de Rosalía de Castro.
 
Despois de varios aprazamentos por cuestións meteorolóxicas, o alumnado de 6º xunto aos compoñentes do club de lectura do CEIP Arquitecto Casas Novoa da Sionlla, percorreron eses lugares, e acompañaron o itinerario coa lectura e coa música, dous compoñentes esenciais na vida e obra de Rosalía.





E durante todo este mes, o alumnado que acode á biblioteca ten a oportunidade de recitar diferentes estrofas e poemas seleccionados por elas e por eles. Rosalía de Castro, Celso Emilio Ferreiro, Neira Vilas, Manuel María, García Lorca..., comparten tempo de lectura con autoras e autores que xa comezan a ser clásicos: Neira Cruz, Ana Mª Fernández, García Teijeiro...





 
 
Pero aínda queda máis: prepara un poema e preséntao ao II Concurso de poesía Bibliolulu. O Día do libro, sobe á biblioteca para comprobar se estás entre os gañadores.
 
 

1 mar. 2016

ENTROIDO 2016

Polo entroido do López Ferreiro, pasaron moitos personaxes medievais: por exemplo, os fantásticos, coma os dragóns de educación infantil; ou os reis e raíñas de cinco anos, aos que acompañaron, facéndolle a corte, os cabaleiros de segundo e os trobadores de primeiro.

Para que non faltara algo que comer e beber, as nenas e nenos de 3º representaron os mesóns medievais. E neste mundo do medievo, non podían faltar as invasións, que, como estamos en Galicia, viñeron dos viquingos de quinto. Todo foi aderezado coas meigas e feiticeiros de cuarto e os personaxes que, como Robin Hood, representaban a xustiza entre un mundo de pobres.

Unha maneira lúdica de estudar, e de representar tamén, a época medieval.

NÓS TAMÉN CON ROSALÍA



Na nosa andaina para-lela de Compostela, non podía faltar a referencia á poetisa por excelencia de Galicia: Rosalía de Castro.

Rosalía viu a luz na nosa cidade, e foi aquí tamén onde desenvolveu as súas primeiras inquedanzas artísticas, e o lugar no que se relacionou con moitos dos intelectuais da época. Todo iso, xunto ás súas experiencias vitais, fíxolle tomar unha conciencia social que segue vixente nos nosos días.

O 24 de febreiro celébrase o seu "Día..", coincidindo coa data do seu nacemento. Nas clases do López Ferreiro, léronse poemas da escritora e realizáronse actividades sobre a súa vida e a obra. E desde a biblioteca, paseamos con ela polos lugares nos que viviu en Santiago, coa técnica do Kamishibai.

A véspera, presentamos a actividade a actividade ás familias. Rematouse cunha homenaxe musical por parte da alumna de 2º A Cecilia Soto, e do profesor da Real Filharmonía de Galicia, Luís Soto, que como papá tamén é membro da nosa comunidade educativa.

Mágoa que o tempo meteorolóxico nos impedira realizar a rota rosaliana por Santiago, programada co alumnado de 6º do noso centro e cos integrantes do club de lectura do CEIP Casa Novoa da Sionlla, que queda para o venres 11 de marzo.

 
NÓS TAMÉN CON ROSALÍA on PhotoPeach

23 feb. 2016

24 DE FEBREIRO: DÍA DE ROSALÍA

A gran poetisa de Galicia, Rosalía de Castro, naceu en Santiago de Compostela. Da man dalgunhas das súas composicións, coñeceremos distintos aspectos da súa vida.



 

17 feb. 2016

PREGOEIRAS E PREGOEIROS DE COMPOSTELA: UNHA HISTORIA PARA-LELA. CONTINUAMOS PREGOANDO.

As nenas e os nenos do López Ferreiro seguen a pregoar as súas lecturas. Queredes escoitarlles cales son? Premede no botón e comprobaredes.


2 feb. 2016

DÍA DA PAZ 2016

A paz pódese facer e transmitir de múltiples formas: iso é o que tratamos de transmitir coas dúas actividades levadas a cabo na biblioteca.

 Miguel Vázquez Freire visitounos, e así soubemos que O home que prantaba árbores foi unha das súas fontes de inspiración, e que non pode existir a paz se primeiramente non respectamos a natureza.

Os máis pequenos, gozaron coa representación de A bruxa Discordia, unha bruxa da que, ao final, soubemos que non era tan mala..., pero había cousas que lle daban alerxia.